07.12.2017

Etter fleire dagar med regn og mildvêr er det no bert heilt opp til Ryssekleiva, og på stølen er det kanskje om lag 5 cm snø i gjennomsnitt. Mykje vatn, også langsetter stien mange plassar.

21.11.2017

Ingen snø før Skitnakleiv. Snømengda er den same på Fjellstøl: om lag 15-20 cm. Noko har kome, noko har gått. No er det litt is i stien på øvste delen, men lett å gå utanom.

10.11.2017

Det var snøvêr (sludd) då eg gjekk til Fjellstøl. Det var 2 cm snø ved Paddetjønn, 3 cm ved Tverrlivegen og 15-20 cm på stølen. Null grader. Etter turen vart snøen borte på nedste delen. Det finst ikkje frost under snøen, så det spørs om han blir liggjande på stølen.
I boka skreiv eg som nr. 615.

14.09.17

Etter ein våt sommar og mykje trafikk er stien til Fjellstøl klinete. No har Gunvor gjort ein del tiltak på dei verste plassane, med grøfting og rensking. Eg har planar om å arbeida meg nedover frå stølen med å finne fleire steinar å leggja på utsette stader. Viss helsa held (ho er noko variabel). Rett nedanfor stølen finst no eit spett, eit grev og gummihanskar. Det er fritt fram å bruka det for å bidra, viss du set det tilbake der du fann det.

24.08.17

Etter nokre dagar med opphald var det i dag tørrare i stien, men framleis litt klinete. Og meir regn er venta.

18.07.2017

Den våte sommaren gjer at det er nokså klinete i stien.
Om lag 300 namn er skrive i boka no.
Kassa vart for ei tid sidan "ramponert" av ein uheldig turgåar med hund, slik at døra vart riven av hengsla. Ho og mannen prøvde å reparere, men eg var ikkje nøgd med resultatet:

Eg har retta opp, med hengsle som ikkje skjuler teksten, og slik at døra går heilt inntil.

5.6.17

Ny kasse er montert på Fjellstøl. Den er laga av lerketre. Døra er dobbel. Når du dreg i knappen til høgre, blir den indre døra heist opp av ei snor. Boka er festa med ein spile, og ein blyant heng i høgre kant, festa i ei snor som kan trekkast ut, og ei fjør dreg snora inn att. Kassa er testa i ulikt vêr i vinter.
Det tok meg mange timar å lage denne kassa, og det var 15 kg + stolpane + verktøy å bere opp. Hadde hjelp av Gjermund Toreid.
Så håpar eg at det fungerer!

23.04.17

Sjølv om det har vore kaldt og snøbyger siste tida, har det ikkje lagt seg nemneverdig med snø opp mot Fjellstøl. I dag var det eit slør av nysnø frå Ringerike og opp, men ikkje meir enn 1 cm nysnø på stølen, pluss nokre fonner/flekkar frå før. Med tørrvêr i sikte er det lite truleg at det blir meir snø å gå i.

01.04.2017

Det har smelta mykje snø no. Frå Ryssekleiva er det snøføre, og på stølen er det kanskje gjennomsnitt 20 cm.
På dei tre fyrste månadane er det skrive 41 namn i boka. 3 nye namn i boka i dag.

11.03.2017

Det er ca. 40 cm tung snø på Fjellstøl, og 10-15 cm halvvegs. I går har fleire folk gått opp med ski og snøbrett, så det er ganske gode spor, som har vorte faste i natt.
I februar vart det skrive 11 namn i kassa.

12.02.2017

Det er fine tilhøve oppover lia no, men ein del is har lagt seg i stien. Likevel er det fint å gå, for du kan lett gå utanom, i lyngen. På stølen er det snøflekkar, men nesten ikkje snø i lia før du kjem til Ringerike.
I januar vart det 19 namn i boka.
I dag var 4-5 personar oppover.

13.01.2017

Gunvor gjekk nesten til Ringerike, og eg gjekk heilt opp, utan truger. Det var 5 cm snø opp til halvvegs, derfrå aukande til ca. 20 cm ved Tverrlivegen, og ca 50-60 cm på det meste frå Ryssakleiva opp til siste brekka før stølen. På stølsvollen var det foke vekk mykje, men gjennomsnitt var det kanskje 40 cm. Det ser ikkje ut til å ha kome meir snø etterpå, og no er det opphald nokre dagar.

1.1.2017

I dag var det vått, men ikkje is nokon stad opp lia. Frå halvvegs er det synleg snø på bakken, men berre eit veldig tynt slør. På Fjellstøl om lag 1 cm nysnø, og små restar etter den gamle.

På arket Statistikk kan du sjå at det er 642 namn i kassa i 2016, om lag 100 mindre enn året før. Grovt sett kan ein seie at nedgangen kom i juli, då det var ei halvering frå i fjor. Variasjonane har samanheng med vêrtilhøva, t.d. ser du at mai og oktober viser stor aktivitet i 2016.

I kassa ligg det no ei bok med plass til 1000 namn (i ein plastpose). Boka blir liggjande heile året.
Utpå våren er det meininga å setje opp ei ny og betre kasse som ikkje tek inn vatn.